طبعاً محدش فينا يقدر ينسى ذكريات الملاهي في الطفولة (السندباد، وجيرولاند، وأكوابارك) وإزاي لما (دريم بارك) فتحت كان بيبقى أسعد يوم فسحة. أكيد كانت أحلى أيام لكن لما تقرأ الموضوع ده هتكتشف إن مفهوم الملاهي اتغير كتير عن زمان. تعرف على أغرب 10 ملاهي ومتنزهات حول العالم!

1. قفص الموت

هتقابل تمساح ضخم طوله 16 قدم وجهاً لوجه في متنزه (كروكوسورس كوف) Crocosaurus Cove  في أستراليا. القفص على شكل أنبوب مصنوع من مادة الزجاج الأكريليك السميك، والتمساح اسمه (تشوبر)    Chopper وعمره 72 سنة، وبيحب يتناول وجباته من اللحوم النية أمام الزائرين. المتنزه بيضم أيضاً أكبر مجموعة من الزواحف الأسترالية على مستوى العالم بعدد 70 فصيلة.

سعر تذكرة الدخول: 35 دولار

سعر تذكرة (قفص الموت): 170 دولار

أغرب الملاهي والمنتزهات_أضخم تمساح_كروكوسورس كوف- book2trip

 

2. سوبر نينتندو

لكل عشاق سوبر ماريو هيتم افتتاح أول ملاهي سوبر نينتندو في اليابان في 2020 تزامناً مع الأولمبياد اللي هتقام هناك أيضاً. الملاهي جاري تنفيذها تحت إشراف (ستوديوهات يونيفرسال، اليابان) والزوار هيقدروا يعيشوا تجربة لعبة سوبر ماريو بشكل واقعي. كمان الملاهي هتوفر ألعاب الفيديو وخدمات فندقية ومطاعم علشان الزوار سواء كبار أوأطفال يقدروا يقضوا اليوم بالكامل هناك.

تكلفة المشروع: 50 مليار ين (431.78 مليون دولار)

 

أغرب الملاهي والمتنزهات_سوبر نينتندو_اليابان book2trip 2

  1. أرض الحفار

ملاهي ديجرلاند (Diggerland) للأطفال والكبار في إنجلترا والولايات المتحدة الألعاب فيها غير تقليدية. زي ما هو واضح من الاسم، كل الألعاب عبارة عن آلات ثقيلة زي الحفارات والجرارات والأوناش ومن أغرب الألعاب هناك لعبة (الكنز المدفون) وهي إنك بتدور على الكنز اللي موجود تحت الأرض باستخدام حفار له ذراع بمخالب. بيقولوا إنك من السهل إنك تلاقي الكنز لكن إنك تمسك الكنز بمخالب الجرار ده اللي مش سهل؟!

سعر التذكرة: 14-17 جنيه استرليني

 

أغرب الملاهي والمتنزهات_ديجرلاند_2 book2trip

4. بوليوود في دبي  

هناك هتشعر وكأنك في الهند. من أول العروض البهلوانية والفعاليات وعروض الرقص المختلفة لحد المطاعم والسينما اللي أكيد بتعرض أفلام هندية فقط. مش بس كده، بإمكانك كمان تحضر تصوير مشاهد من الأفلام الهندية ولو كنت من هواة المسرحيات الغنائية فمسرح (راج محل) اللي بيتوسط المتنزه وله طابع فريد بيقدم النوع ده من المسرحيات على غرار مسارح برودواي.

سعر تذكرة الدخول يبدأ من: 95 درهم

أغرب الملاهي والمنتزهات_بوليوود book2trip_دبي

 

  1. مدينة العجائب كالكار

العجيب فيها إنها اتبنت بغرض إنها تكون مفاعل نووي في كالكار في ألمانيا، لكن بعد انفجار مفاعل تشيرنوبل في أوكرانيا في 1986 قامت مظاهرات لمنع استكمال بناء المفاعل، ده بالإضافة إلى العيوب اللي في تصميمه، وفضل المفاعل مغلق إلى أن اشتراه رجل أعمال هولندي بمبلغ 3 مليون دولار وقام بتحويله إلى ملاهي. بيزور الملاهي 600,000 زائر سنوياً وبيضم ستة فنادق ومطاعم متنوعة ومراجيح دوارة وحوائط تسلق.

سعر التذكرة: 13-18 يورو

أغرب الملاهي والمتنزهات_مفاعل كالكار_ألمانيا- book2trip

 

  1. هاسيندا نابوليس

من وكر مخدرات إلى متنزه ومعناها نابوليس العقارية ومكانها كولومبيا. المدينة كان بيمتلكها بابلو إسكوبار وهو أخطر زعيم مافيا مخدرات في العالم. الأرض بتضم مجموعة من العقارات، وحديقة حيوان خاصة، وبحيرات صناعية، وحلبة مصارعة ثيران، وبقايا أسطول سياراته، لكن الأغرب إن فيها مطار خاص كان بيستخدمه زعيم المافيا في تهريب الكوكايين، وإلى الآن بقايا طائرته الخاصة موجودة في مدخل المدينة. ولما أطلقت الشرطة النيران على بابلو إسكوبار في 1993 انتقلت ملكية نابوليس العقارية إلى الحكومة الكولومبية اللي حولته لمتنزه ومتحف للزائرين.

سعر التذكرة: 42-127 دولار

 

أغرب الملاهي والمتنزهات_هاسيندا - book2tripنابوليس 2

  1. سجن أباشيري

إيه رأيك لو تقضي يوم فسحة في السجن؟ سجن أباشيري هو سجن تاريخه مرعب وبيعتبر من أسوأ سجون اليابان منذ تأسيسه من 118 سنة. يتكون السجن من 25 مبنى، وكان مخصص وقتها لعتاة المجرمين. لكنه تحول الآن إلى متحف الناس بتزوره للتعرف على حياة النزلاء وقتها كانت عاملة إزاي. الغريب إن في كل غرفة من غرف السجن تماثيل بتجسد حياة النزلاء أثناء حياتهم اليومية وأثناء العمل لتقريب الصورة بشكل أوضح للزائرين.

سعر التذكرة: 540-1080 ين

 

book2trip أغرب الملاهي والمتنزهات_سجن أباشيري-اليابان 2

8. منجم الملح

هو منجم ملح مهجور على عمق 400 قدم تحت الآرض في رومانيا. كان بيستخدم زمان كمخزن لحفظ الجبن وكمخبأ أثناء الحرب العالمية الثانية لحد ما قامت السلطات مؤخراً بتحويله إلى متنزه ترفيهي بيضم عربة ملاهي، وملعب جولف، وصالة بولينج، وملاعب كرة طاولة، وبحيرة ومراكب صغيرة. المذهل في المنجم هو احتوائه على 3 مليار طن من الملح المعروف ببثه للطاقة الإيجابية والأجمل من كده إضاءة المنجم بطريقة فنية رائعة أقرب للخيال.

سعر التذكرة: 4 دولار

أغرب الملاهي والمتنزهات_منجم الملح_رومانيا- book2trip

 

  1. أوروبا الصغيرة

في أوروبا الصغيرة هتحس إنك عملاق! هي حديقة شاسعة في بلجيكا بتضم نماذج مصغرة لغالبية معالم أوروبا السياحية. يعني تقدر تشوف أوروبا بالكامل في مكان واحد في ساعات قليلة جداً. النماذج تم تنفيذها بمنتهى الدقة علشان تطابق المعالم الأصلية لدرجة إن كل دولة بتصرف مئات الآلاف من اليورو لتنفيذ النماذج الخاصة بها. الجميل أيضاً إن المعالم المتحركة زي القطارات والبراكين والمطاحن بيصاحبها أصوات هتخليك تعيش التجربة وكأنك سافرت بالفعل للبلاد دي. وفي نهاية الجولة تقدر تزور منطقة العرض التفاعلي اللي بيتم عرض تاريخ أوروبا فيها من خلال الوسائط المتعددة.

سعر التذكرة: 12-35 يورو

أغرب الملاهي والمتنزهات_أوروبا الصغيرة_بلجيكا- book2trip 2

 

  1. فيراري لاند

هي مدينة ملاهي في إسبانيا. تكلفة إنشائها 100 مليون يورو وبتضم أعلى وأسرع قطار ملاهي في أوروبا بارتفاع 111 متر وسرعة 180 كلم/ الساعة. اللي بيميز ملاهي فيراري لاند إن كل حاجة فيها متعلقة بفيراري. يعني من أول المطاعم والمحلات اللي بتحمل رمز فيراري لحد ملاعب الجولف والشاطئ  وفندق فيراري صاحب تصنيف 5 نجوم. محبي سباقات الفورمولا هيلاقوا ألعاب محاكاة كتير للسباقات المختلفة هناك. المدينة تشبه إلى حد كبير مدينة فيراري أبو ظبي اللي فيها أسرع قطار ملاهي في العالم بسرعة 240 كلم/ الساعة.

سعر التذكرة: 47- 55 يورو

أغرب الملاهي والمتنزهات_فيراري لاند_ أسبانيا- book2trip

 

إيه أغرب ملاهي ومتنزه عجبك ونفسك تزوره؟ شاركنا رأيك.
ولو بتحب تقرأ عن أغرب الأماكن اللي ممكن تزورها، اضغط هنا