ساعات بنكون عايزين نسافر بس بيبقى قدامنا عوائق كتير من أهمها و أبرزها الـتأشيرة اللي إجراءتها غالبا بتبقى كتير و صعبة و تكلفة التأشيرة نفسها بتبقى عالية و في الآخر يا تتقبل يا تترفض. إيه رأيك إن جواز سفرك المصري ينفع يدخلك كذا بلد من غير إجراءات استخراج الـتأشيرة المملة و بدون تكلفة تًذكر؟ : ) هنا هنقولك أسهل 6 تاشيرات للمسافر المصري لدول ممكن تسافرها بسهولة، وهنقولك كمان الإجراءات المطلوبة، وتكلفة المعيشة في كل بلد، والأماكن اللي ممكن تزورها هناك.

1. ماليزيا

1.أسهل 6 تأشيرات للمسافر المصري _ماليزيا

من أحلى البلاد اللي ممكن تزورها في آسيا و هي بتجمع ما بين الأجواء العصرية و المزارات الطبيعية في نفس الوقت.

تذاكر الطيران مش عالية جداً، يُعتبر سعرها معقول مقارنة بالدول اللي حواليها، يعني متوسط سعر تذكرة الطيران ذهاب وعودة بيبقى في حدود 10,000 جنيه مصري.

التأشيرة مش بتحتاج أي إجراءات مسبقة يعني ممكن تستخرجها عند الوصول و بتبقى مجانية تماماً.  كل المطلوب بس إبراز تذكرة طيرانك ذهاب و عودة، و يكون عندك حجز إقامة في مكان، وجواز سفرك يكون ساري لمدة 6 شهور. لو استوفيت كل الشروط تأشيرة ماليزيا اللي هتاخدها هتبقى سارية لمدة 3 شهور كاملين 🙂

بالنسبة للإقامة سعر الغرفة بيتراوح ما بين 15 دولار إلى 200 دولار على حسب الفندق اللي هتنزل فيه، و لو هتأجر مكان من المالك بيبقى السعر أقل طبعاً يعني ممكن تأجر شقة كاملة ب200 دولار في الليلة و ده هيبقى اختيار أفضل لو هتسافر مع مجموعة صغيرة.

أسعار الوجبات قريبة شوية من أسعار الوجبات في مصر و الميزة للمسلمين إن ماليزيا بلد مسلم و أغلب الأكل هناك حلال. سعر الوجبة لو في مطعم شعبي بيبقى ما يعادل 50 جنيه مصري تقريباً، و لو مطعم متوسط وجبة كاملة لشخصين ممكن تكلف في حدود 200 جنيه مصري، أما السلع الأخرى فسعرها حوالي ضعف سعرها في مصر، وبالنسبة للمواصلات العامة فسعر التذكرة تقريباً بما يعادل 12 جنيه مصري.

أفضل وقت ممكن تزور فيه ماليزيا و تستمتع بجوها بيبقى في الصيف يعني من شهر يونيو لمنتصف سبتمبر تقريباً و ده بيبقى الموسم السياحي هناك.

(كوالالمبور) هي العاصمة وأشهر المدن هناك، و أبرز الأماكن اللي ممكن تزورها فيها البرجين التوأم (بتروناس) و اللي بيعتبروا من أعلى الأبراج في العالم، وممكن تزور حديقة الطيور اللي بتضم عدد كبير من الطيور النادرة، وحديقة الفراشات اللي هتبهرك بجمالها لأنها بتعتبر جزيرة استوائية مصغرة، و كهوف (باتو) طبعاً لمحبي الهدوء لأنها هتنسيك شوية صخب العاصمة، و لو حبيت تشوف حاجة  بطابع مختلف ممكن تروح السوق الصيني، أو تزور مبنى السلطان عبد الصمد المُصمم على الطراز الأسباني.

لحجز وحدات للإقامة في ماليزيا، اضغط هنا.

2. كينيا

2. أسهل 6 تأشيرات للمسافر المصري _كينيا

كينيا دولة بتقع في شرق أفريقيا و تعتبر وجهة ممتازة للناس اللي بتحب الطبيعة و الحياة البرية بسبب انتشار الحدائق و المحميات الطبيعية هناك.

تذاكر الطيران سعرها مش عالي على الإطلاق يعني التذكرة ذهاب و عودة ممكن تكلف أقل من 7000 جنيه مصري و ده يُعتبر سعر مناسب جداً، والإقامة كذلك تعتبر مصاريفها حتى أقل من ماليزيا يعني متوسط سعر الغرفة لو في فندق عادي 15 دولار، ولو فندق فاخر متوسط السعر تقريباً بيبقى 135 دولار شامل الإفطار.

بالرغم من انخفاض سعر التذاكر والإقامة إلا إن تكلفة المعيشة هناك عالية جداً، يعني متوسط سعر الوجبة الشعبية حوالي 90 جنيه مصري، ولو وجبة كاملة لشخصين في مطعم متوسط السعر هيبقى في حدود ما يعادل 400 جنيه مصري، والسلع الأخرى كذلك، أما المواصلات العامة فسعرها متوسط يعني تذكرة النقل العام سعرها يعادل 12 جنيه مصري.

بالنسبة للـتأشيرة بيكون استخراجها عند الوصول بمصاريف 50 دولار مع إبراز حجز طيران ذهاب و عودة و حجز فندق مؤكد، و طبعاً لازم يكون جواز سفرك ساري لمدة 6 شهور على الأقل، ولما تستلم تأشيرتك بتبقى سارية لمدة شهر.

أفضل وقت لزيارة كينيا في القترة من يونيو لأكتوبر لأن ده موسم الجفاف، وبتقدر وقتها تستمتع بالمحميات والحدائق من غير سقوط لأي أمطار اللي ممكن تفسد عليك أجازتك، والناموس في الوقت ده بيبقى قليل، وكمان ده وقت هجرة بعض الطيور والحيوانات ووقتها حقيقي هتعيش تجربة فريدة من نوعها.

أغلب الأماكن الشهيرة هناك حدائق و محميات طبيعية و اللي لازم على قد ما تقدر ما تفوتش أي حاجة منها زي مثلاً (ماساي مارا) اللي بتعمل فيها سفاري وتمشي بعربية وسط الحيوانات عادي، و محمية (أمبوسيلي)، و (هيلز جيت ناشيونال)، و لمحبي الأماكن التاريخية ممكن تزور قرية (لامو) اللي بتعتبر أقدم جزيرة هناك وهي مكان ممتع وهادئ و فيها مناظر طبيعية جميلة.

3. الأردن

3. أسهل 6 تأشيرات للمسافر المصري _الأردن

طبعا لو عايز تزور بلد عربي من غير تأشيرة في عدة بلاد منها الأردن و هتستمتع جداً هناك خصوصاً لو بتحب الطبيعة والأماكن التاريخية.

في كذا طريقة ممكن تسافر بيها الأردن من مصر. ممكن عن طريق الطيران والتكلفة مش بتكون عالية خالص. ممكن تذكرة الذهاب و العودة تكلف أقل من 5000 جنيه مصري على حسب الخطوط اللي هتسافر عليها وعلى حسب الوقت اللي هتحجز فيه.

لو عايز طريقة ممتعة أكتر وتبقى تجربة جديدة، ممكن تسافر من نويبع باللانش السريع والوسيلة دي مش متعبة لأنك بتوصل في ساعة ونص و بتبقى طبعاً أرخص كتير من الطيران.

بالنسبة للتأشيرة فهي مش مطلوبة منك على الإطلاق حتى عند وصولك وكمان مش بتدفع أي مصاريف دخول .. بتظهر بس جواز سفرك الساري و أهم شيء يكون مكتوب فيه جهة العمل.

 للتأكيد أكتر ممكن تاخد معاك ورقة من جهة عملك تثبت إنك بتشتغل بالإضافة إلى حجز فندق. ده مش إلزامي أبداً لكن من باب الإحتياط مش أكتر.

الأسعار في الأردن مرتفعة جداً.. يعني مثلا الوجبات هناك لو هتاكل في مطعم شعبي ممكن الوجبة تكلفك حوالي 130 جنيه مصري، و لو وجبة كاملة لشخصين في مطعم متوسط هتكلفك في حدود 750 جنيه مصري. بالنسبة للمواصلات العامة فهي رخيصة لكن للأسف مش متوفرة دايماً و ما بتوصلش لأماكن كتير، يعني دايما هتضطر تركب تاكسي والتاكسي هناك تعريفته عالية، علشان كده يُفضل إنك تستخدمه في أضيق الحدود.

بالرغم من غلاء الأسعار للسلع و الوجبات إلا إن الإقامة هناك رخيصة نسبياً. يعني تكلفة الإقامة بتتراوح من 20 دولار للغرفة في الليلة، وممكن تأجر شقة كاملة من أحد الملاك هناك بأسعار تبدأ من 150 دولار وده هيبقى مناسب وموفر لو عدد المسافرين أكتر من شخصين.

مفيش وقت مفضل إنك تسافر فيه للأردن لأن طول السنة الجو معتدل. الصيف الجو فيه معقول وحتى لو الحرارة ضايقتك، ممكن تروح مكان زي مدينة (العقبة) واللي فيها منتجعات كتير على البحر الأحمر. ممكن تستمتع هناك بالبحر والغطس وكمان في أماكن ممكن تروحها في الشتاء زي البحر الميت اللي ممكن تستمتع بيه عادي في الشتاء بسبب دفئه وفوايده العلاجية، ومدينة (عجلون) وهي مدينة حواليها جبال وبيسقط فيها الثلج في الشتاء، فأكيد منظر الجبال والثلج هيشدك، وكمان ممكن تزور فيها أماكن زي قلعة عجلون ومحمية عجلون، دة غير إن الأردن بتشتهر بالأماكن التاريخية العريقة و العظيمة جداً زي (البتراء) وهي مدينة محفورة داخل الجبل وبتتميز بعمارتها المبدعة جداً و مدينة (جرش) اللي فيها مزارات تاريخية كتير من أيام الرومان.

لأفضل أماكن الإقامة في الأردن، اضغط هنا.

4. لبنان

4. أسهل 6 تأشيرات للمسافر المصري _ لبنان

لبنان كمان من البلاد العربية اللي ممكن تزورها لو عايز تسافر لبلد عربي. (بيروت) العاصمة مثلا بتجمع ما بين الحياة الريفية الهادية والحياة المرفهة الحديثة اللي من المؤكد هتقضي فيها وقت ممتع.

تذكرة الطيران من مصر إلى لبنان رخيصة تقريباً نفس سعر تذكرة الأردن يعني ذهاب وعودة أقل من 5000 جنيه مصري، والميزة كمان إن وقت السفر قليل جدا تقريباً ساعة وربع و بكده الرحلة مش هتكون مرهقة ومش هتضيع وقت كتير في الجو.

في طريقتين لاستخراج التأشيرة ..

الطريقة الأولى والأحسن إنك تستخرجها أونلاين عن طريق موقع السفارة الرسمي، والإجراءات بتبقى سهلة وتكلفتها 20 دولار ومن غير شرط إن يكون معاك كشف بنكي أو أي مبلغ.

الطريقة التانية استخراجها عند الوصول ودي بتتطلب إن يكون عندك حجز فندقي مؤكد وتذكرة ذهاب وعودة، ويتطلب وقتها إظهار مبلغ 2000 دولار ما بيتدفعش منهم إلا 20 دولار بس مبلغ استخراج التأشيرة.

الإقامة أسعارها متوسطة يعني ما بين 50 دولار إلى 150 دولار للمكان على حسب الموقع والخدمات اللي المكان بيقدمها والمساحة طبعاً.

بالرغم من المميزات السابقة كلها إلا إن لبنان تكلفة المعيشة فيها والمواصلات – سواء التاكسي أو المواصلات العامة – عالية جداً حتى إنها أعلى من الأردن بكتير. يعني لو وجبة شعبية صغيرة هتكلف حوالي 214 جنيه ولو وجبة كاملة لشخصين في مطعم متوسط حتى مش فاخر هتكلفك ما يعادل 970 جنيه مصري!

في حل للمشكلة دي وهي إنك ممكن تاخد معلبات معاك قبل السفر وده هيقلل التكلفة جدا، أو إنك تعتمد بنسبة كبيرة على الفواكه والخضار لأن تكلفتهم إلى حد ما معقولة وبيتراوح الكيلو ما بين 15 جنيه مصري إلى 31 جنيه مصري على حسب النوع اللي هتشتريه.

في أماكن كتير ممكن تستمتع بيها هناك سواء تاريخية أو طبيعية خصوصاً في الريف االلي فيه جبال ووديان منظرهم رائع، ومن المزارات المهمة اللي ممكن تشوف فيها ده مزار (سيدة لبنان) اللي بيطل على خليج (جونية) ويمكن الوصول له بالتلفريك، وتقدر تستمتع بالمنظر من فوق وده يعتبر تجربة مميزة لأي سائح، و طبعاً لازم تزورغابات (شجر الأرز) اللي بيميز لبنان وبيبقى كمان أفضل في الشتاء مع منظر الثلج، وممكن تروح العاصمة بيروت لو بتميل ناحية الحياة المدنية تستمتع بالتسوق و تتمشى في شارع (الحمراء) اللي يعتبر أشهر شارع هناك.

اضغط هنا للبحث عن وحدات متنوعة للإقامة في لبنان.

5. سريلانكا

5. أسهل 6 تأشيرات للمسافر المصري _ سريلانكا

من ضمن البلاد اللي ممكن تروحها كمصري من غير تأشيرة هي سريلانكا ودة خبر ممتاز للناس اللي محتاجة رحلة هادية لأن سريلانكا عبارة عن مجموعة جزر بعيدة غاية في الجمال 🙂

تذكرة الطيران بالنسبة لوجهة بعيدة زي دي يعتبر سعرها متوسط ومناسب تقريبا في حدود 8000 جنيه مصري ذهاب وعودة على حسب خطوط الطيران و توقيت الحجز.

سهل جدا الدخول لسريلانكا لأن مفيش أي شروط للتأشيرة، واجراءاتها سهلة ممكن تستخرجها أونلاين من الموقع الرسمي للسفارة ب35 دولار أو عند وصولك للمطار بنفس السعر.

بغض النظرعن سعر التذكرة اللي ممكن تحس إنك دفعت فيه كتير .. مصاريف المعيشة والمواصلات وحتى الإقامة هناك حقيقي هتعوضك عن المبلغ دة لأن في الرحلة كلها ممكن تدفع أقل من اللي بتدفعه في رحلة داخل مصر بسبب إن الجنيه المصري أعلى من عملة سريلانكا بكتير. يعني الإقامة في أماكن متوسطة بتتراوح من 15 لـ 40 دولار ولو مكان فخم جداً متوسط سعر الإقامة بيكون 120 دولار.

 الوجبة لفرد في مطعم بسيط هتكلفك 25 جنيه، ولو فردين في مطعم متوسط تكلفك أقل من 200 جنيه، ده غير إن المواصلات كمان رخيصة جداً وسهلة. ممكن ما تستعملش المواصلات العامة و تستخدم “توتوك” وهي مواصلة زي التاكسي سهلة وآمنة ومنتشرة جداً في كل مكان.

غالبا أكتر حاجة هتحب تعملها هناك هي الاستجمام على الشواطئ الساحرة خصوصاً في (كولومبو) عاصمة سريلانكا وأشهر جزيرة فيها اللي بتطل على المحيط الهندي. وممكن تزور بحيرة (كاندي) ، وبالاضافة إلى شاطئ البحيرة ممكن كمان تزور مصانع ومزارع الشاي هناك اللي بتتميز بيها سريلانكا. أما جزيرة (بنتوتا) ففيها منتجعات سياحية على درجة عالية من الرفاهية، وهناك لازم تروح رحلة لوادي الحيتان علشان تشوف أنواع كتير من الحيتان عالطبيعة ودي من أكتر الحاجات المميزة اللي ما ينفعش تفوتها.

للبحث عن وحدات مختلفة للإيجار في سريلانكا، اضغط هنا.

6. جورجيا

6. أسهل 6 تأشيرات للمسافر المصري_جورجيا

وأخيراُ .. بالرغم إن في العادي من الصعب جداً دخول أوروبا وأصعب جزء في السفر ليها طبعاً هو استخراج تأشيرتها، إلا إنك ممكن تروح جورجيا – وهي دولة أوروبية جميلة جداً وبتتميز بطابع قديم – من غير اجراءات صعبة للتأشيرة.

أغلى حاجة في الرحلة ممكن تكون تذكرة الطيران و بيبقى متوسط سعر التذكرة 10,000 جنيه تقريباً ذهاب وعودة.

بالنسبة لاستخراج التأشيرة فالسلطات الجورجية نفسها بتطلب بس فيزا إلكترونية وبتبقى سارية بحد أقصى لـ 30 يوم، لكن السلطات المصرية بتتطلب إن التأشيرة تبقى ملصقة على جواز سفرك.

بيتم استخراجها الأول عن طريق الإنترنت بمبلغ 20 دولار، وملء الاستمارة المخصصة وإرفاقها بصور ليك وصور لجواز سفرك الساري، وكشف حساب لا يقل عن 10,000 جنيه، وتأمين صحي.

بعد استخراج التأشيرة بتتوجه بيها وبالأوراق المطلوبة للجهة المختصة لطبعها على جواز السفر واستخراج الموافقة الأمنية.

على عكس المتوقع، مصاريف المعيشة والإقامة هناك مش مرتفعة مقارنة بدول أوروبية كتير.

بالنسبة للإقامة بيتراوح سعر الغرفة من 30-60 دولار على حسب جودة المكان، وممكن كمان تحجز في صالة نوم مشتركة بأسعار تبدأ من 8 دولار وده حل عملي لو عايز توفر فلوس الإقامة لحاجات تانية أكثر متعة خاصة إن صالات النوم المشتركة هناك معظمها نظيف و آمن.

بالنسبة لأسعار السلع الغذائية فهي في حدود المعقول. الوجبة في مطعم بسيط للفرد تتكلف حوالي 100 جنيه مصري، ولو وجبة كاملة لفردين في مطعم متوسط تتكلف حوالي 350 جنيه مصري، ده غير كمان إن المواصلات هناك رخيصة جداً سواء العامة أو حتى التاكسي اللي بيُعتبر وسيلة موصلات غالية في أوروبا عموماً.

من المزارات الجميلة والمشهورة اللي ممكن تزورها هناك كاتدرائية (تسميندا سامبا) وقلعة (باريكالا) في (تبليسي) اللي ممكن تزورها بالترام الجوي، واللي هتستمتع بمعمارهم جداً، وبالمنظر من فوق كمان. وشارع (روستافلي) اللي له طابع قديم وموجود فيه أشهر المتاحف والمحلات التجارية. ولو إنت من محبي الطبيعة يبقى ما ينفعش تفوت زيارة جبل (كازبيك) وبحيرة (ريتسا) اللي بيُعتبروا إطلالات طبيعية ساحرة.